الجمعة , 13 ديسمبر 2019
أخبار عاجلة
الرئيسية / مقالات / أيمن الشحات يكتب: كيف تصبح عضو مجلس نواب خلال 3 أشهر ؟
style="display:block; text-align:center;" data-ad-layout="in-article" data-ad-format="fluid" data-ad-client="ca-pub-3754746322068505" data-ad-slot="2723352953">

أيمن الشحات يكتب: كيف تصبح عضو مجلس نواب خلال 3 أشهر ؟

عايز تبقى عضو مجلس نواب نفذ اللى هقولك عليه بالحرف وبسرعة وياسلام لومعاك شوية فكة علشان تجذب الناس..

١ – فصل 5 جلبيات بلدي صوف غاليين بالجلبيات البيضة اللي تحتيهم وشال كشمير محترم.

٢ – تروح أي عزا في الدايرة وتدخل من قدام حتي لو في قرايبك من هو أكبر منك سنا ومقاما.

٣ – تروح أي فرح دعيت إليه أم لم تدعي وتسلم علي أهل العريس والعروسة والمدعويين.

٤ – تتصرف ولو حتي هتستلف وتدبح عجل كل سنة وتوزعه علي كل الناس الباينة اللي ممكن تحشد لك أصوات.

٥ – تسمع عن أي صلح تروح تحشر نفسك في اللمسات الأخيرة وتقعد من قدام.

٦ – تسمع عن أي ست غضبانة تروح لجوزها وتسمع منه وتاخد حد من أهله وتصالحهم.

٧ – تنزل يفط كتير في العيد ودخول رمضان وتحط صورتك وتهنئ الأمة الاسلامية وفي الأعياد المسيحية تهنئ الأخوة الأقباط.

٨ – أوعي تتكلم مع حد فى السياسة عشان علشان محدش يكشف انك ميح، واذا حد من المواطنين سألك أي سؤال سياسي ترد بإجابة واحدة ..”ربنا يصلح الحال”.

٩ – تمشي مع التيار.

١٠ – تسمع عن أي مدرسة هتتبني أو أي شارع هيترصف تروح كاتب طلب وموديه الأبنية التعليمية، أو مجلس المدينة، وتدَّعي كذبا وزورا وبهتانا إنك أنت اللي عملته.

١١- أي افتتاح لأي مدرسة، أو طريق، أو شارع أو مصنع علي طول تروح رايح وتحشر نفسك وتتصور وتنشر على الفيس.

١٢ – أي مسجد هيتبني تروح وتدفع تبرع مالوش لزمة عشان تحضر إفتتاح المسجد كإنك أنت اللي بنيته.

١٣ – أي فرصة للخطابة في أي مناسبة امسك الميكروفون وقول كلمتين.

١٤ – تنتقد المستشفي بمناسبة ومن غير مناسبة.

١٥ – تصاحب الظباط وأمناء الشرطة عشان لو حد اتمسك تروح تطلعه من المركز.

١٦ – لو الجلبيات قدمو فصل جلبيتين تانيين.

١٧ – عربيتك لازم تكون كبيرة ومحترمة ولو ماعندكش استلف عربية من حد تبعك عشان لما تروح عزا أو فرح.

١٨ – ماتمشيش من غير ٥ أو ٦ رجال تنقيهم محترمين حواليك يعملولك جو وكده.

١٩- كل بلد تروحها تقوللهم ايه اللي ناقصكم ؟؟ يعني قال انت اللي ها تكمله.

٢٠ – أي حد بيتفزلك وبيسأل أسئلة كتيرة وصعبة صاحبه بسرعة وخد تليفونه وقوله انت عجبتني عشان مخك حلو والله ينور عشان ينشغل بكلامك ويبطل يسأل.

21- صاحب طوب الأرض وتقعد على القهاوي وتلم شله حواليك بحيث يكون ليك هيبة كدة وزيطة كدابة ودايما صوتك يبقي أعلي من كل الموجودين للفت النظر والإنتباه .. ويا سلام بقي لو بتشرب شيشة كمان وتحسس الناس انك معلم وابن سوق وفاهم في كل حاجة.

22- اتكلم فى التليفون كتير وحسس انك اللى حوليك انك بتكلم الضابط فلان والمسؤول علان علشان الناس تحس انك مش أى كلام.

23- اعزم ناس من برة البلد لابسين بدل وعبايات وعلى صوتك وانت بتقول لهم نورتنى يامعالى المستشار وسيادة اللوا.

24 حاول تظهر فى كام برنامج على اى قناة وشير على الفيسبوك يامعلم.
وفى النهاية قول نويت وتوكلت على الله .. وربنا مع الشعب الغلبان

عن admin

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *